مذيعة .. مع ايقاف التنفيذ ..

ازيكم .. انا ايار من برنامج " فضفض من قلبك " ...

هانتكلم انهاردة عن موضوع مش بيجى على بال ناس كتير .. بالرغم من اهميته فى حياتهم ... هانتكلم عن التصوير .. التصوير فى حياة كل واحد فينا ..

*من اول يوم فى حياتك وانت لسة بتوأوأ .. والدك بيبقى فرحان بيك جدا طبعا وبيبقى حريص انه يسجلك اول صرخة .. اول ضحكة .. اول سقفة .. وانت بتتمرج وانت مشلفط نفسك بالاكل وانت بتعلب بالكورة ....

*ومتنكرش احساس السعادة والفخر اللى بيتنابك وانت بتورى الصور دى لاحفادك وبتنقل لهم ذكرياتك من اول صورتك وانت فى اللفة ولحد صور حفلة تخرجك من الجامعة ....

* وبنفس الشكل اللى انت نقلت بيه تراثك لاحفادك واحفادك نقلوه لاحفاد احفادك برده الفراعنة استخدموا نفس الطريقة علشان ينقلوا لنا حضارتهم عن طريق تصوير او رسم تفاصيل حياتهم اليومية على جدران المعابد .. ولولا الرسوم دى .. اكيد حضارة قداء المصريين كلها ...كانت هاتبقى فى خبر كان !!

* وفى حياتنا المعاصرة التصوير بقى مهم جدا وخاصة فى معاملاتنا الرسمية لاننا بنحتاج الصور الشخصية - ال4فى 6 دى عارفينها؟- واحنا بنطلع شهادة ميلاد , شهادة تخرج , جواز سفر الخ الخ ..

* صعبان عليا اوى الناس اللى اتولدت وعاشت قبل اختراع التصوير .. لان الرسامين كانوا بيرسموا الملوك والامراء اما الناس العاديين .. طبعا مكانوش يقدروا يجيبوا رسامين علشان يرسموهم .. يعنى الناس دول عاشوا وماتوا بلا ماضى ومن غير مايخلدوا ذكراهم الا فى قلوب الناس اللى عرفوهم وحبوهم ..

* وعلشان كدا انا بحيي اللى اخترع التصوير .. وبحيي اكتر اللى ابتكر كاميرا الموبايل ..لانه مش بس اتاح للناس انهم يصوروا كل اللحظات الجميلة فى حياتهم .. لا دا اتاح ليهم كمان يصوروا اى لقطة ممكن تلفت انتباهم فى اى مكان واى زمان..

* ونصيحة من برنامجنا لصديقى المشاهد:

انزل بكرة اشترى البوم كبييييييير وجمع فيه كل صورك وصور عيلتك وحبيايبك وصحابك ... واوعى .. اوعى تروح مكان ومتتصورش فيه .. دى اللحظة اللى بتروح مبترجعش تانى .. مش كدا ولا ايه ؟!

*وكمشاركة بسيطة من برنامجنا فى ذكرياتكم هانعمل مسابقة لاحسن واطرف صورة صورتوها بنفسكم ...

هانستنى رسايلكم على ايميل برامجنا min _2albak @ainshamsuniv .com >>

وهانستقبل اتصالاتكم التليفونية على مدار حلقاتنا الجاية علشان تحكولنا على ذكرياتكم مع الصور والتصوير ...

فانتظرونا .. والى اللقاء ..

اللى فات دا كان تصورى عن برنامج كنت محضراه علشان اقوله فى محاضرة دكتور غادة واللى جاتلى فكرته من بوست كتبته فى مدونتى بعنوان " انا انسانة بلا ماضى " http://3enadeya.blogspot.com/2008/03/blog-post_07.html

وبالمناسبة دكتور غادة دى اللى هاتمتحنا امتحان المذيعين (ربنا يستر ادعولى ) وانا بعشق الدكتورة دى لدرجة ان انا - البربنت !- لما بقف قدامها مبعرفش اقول ولا كلمة .. دكتورة كدا بتنح قصادها هياما وعشقا ..

و كان المفروض هارتجل الموضوع دا قدام الدفعة كلها - ياخبر! - كويس ان انا معملتهاش .. بس انا كنت محضراه وحفظاه .. يعنى ولا هارتجل ولا حاجة .. لكن للاسف انا ولا رحت .. ولا قلت ولا ارتجلت ...

هاتسألونى ليه ؟!

روحوا اسالوا المنبه .. منه لله !

المهم انى لو مكنتش قلته كنت هاطق اموت .. يعنى يرضيكم اطق اموت ؟!

اينعم انتوا لو كنتوا سمعتوه بصوتى كان هايأثركم طبعا بس معلش ...

غمضوا عينكم وتخيلونى وانا بقوله !!

ملحوظة صغنتتة :

" الايميل اللى فى البرنامج فوق دا ايميل وهمى لحسن حد يوزه عقله يدخل يعنى .."

ها يلا قولولى رايكم ايه فى البرنامج ؟!

قلته حلو ؟!

الاعلامية المهيـــــ ايار الكويسة ـــــــسة