بين يوم وليلة ..

داخلة المحاضرة .. بفتح الشنطة ملقتش كشكول المحاضرات.. اتسرعت .. قلت فى نفسى اكيد فى البيت .. واستلفت ورقة من حد وكتبت المحاضرة .. روحت البيت دورت على الكشكول .. هديت الدنيا .. وملقتش حاجة .. وشى قلب وكنت هاعيط .. معقولة مجهود التيرم كله يروح .. يعنى افضل احضر فى محاضرات احضر فى محاضرات وفى الاخر يضيعوا كدا بكل سهولة .. شوية واختى قالت لى اتصلى بهبة اعرفى هاتخرجلكوا ولا لا - هبة دى بقى كانت زميلة اختى والمفروض انها هاتخرج لنا المشروع - بس دا مش عشان انا مبعرفش اخرج .. لا بس عشان مش هاعرف اسيطر على اتناشر نفراية كل نفراية ونفراية بميت نفراية لوحدها .. دا غير ان كل نفراية ليها راى ورؤية رائعة ..وعاوزة تنفذها !!

المهم اتصلت بهبة وانا بفكر وديت كشكول المحاضرات فين .. الهاتف الذى طلبته غير موجود بالخدمة .. ايه اليوم الجميل دا..

كلمتها على الموبايل وخدت الرقم تانى .. مشغول .. كلمتنى هى وزى كل المخرجين اللى قبلها ... هاتعرض خدماتها من غير ماتنزل تصور - كأن احنا عندنا جرب بنطفش المخرجين !!-

تانى يوم ينقلب الحال 180 درجة .. اطلع الاقى الكشكول بكل سهولة عند العامل بتاع الغرفة اللى كنا بناخد فيه محاضرة اسامة ( اذا كنت متعرفش مين اسامة ارجع للبوست السابق ) واكتشف انى لما كنت فى المحاضرة اللى فاتت طلعت اقول خبر .. وقعت الكشكول تحت البنج (الديسك يعنى ) ونسيت من لهوجتى اجيبه تانى ... وفى نفس اليوم برده الاقى اختى بتتصل بيا وجايبة لنا مخرج قرر اخيرا انه يكمل معانا (يظهر مامته داعية عليه !!) ويارب ميكنش ورايا دلوقتى... اصلى كل ماتكلم على حد يطلع ورايا ...

الامور بتتبدل من لحظة للتانية .. تبات نار تصبح رماد .. تتراكم الهموم فى لحظة وتتفك فى لحظة ... يعنى فى اليوم اللى بعده وبعد الامور ما اتعدلت شوية وبعد ماناخد موافقة على فكرة .. اينعم اجبرنا عليها.. بس حبيناها.. نكتشف بالصدفة انها مش هاتدخل التقييم ليه علشان صامتة .. ويبقى الدكتور بيقول حلوة .. ورئيسة القسم تقول مش هاتنفع .. واحنا اللى ضايعين فى النص (ادى حال التعليم المصرى) ... وكمان فى نفس اليوم اسمع انى مش طالعة الاقصر واسوان اللى هى حلم حياتى وبستناها بقالى اربع سنين .. والسن اللى فاتت مطلعتهاش عشان امتحان الميد تيرم .. والسنة دى لنفس السبب مش هاطلع الرحلة واسمع الخبرين فى نفس اليوم - محدش عنده رحلة سلف للاقصر واسوان علشان انا مش هاعرف اطلعها تانى .. بزمتكوا مش ليا حق احقد على اختى اللى طلعتها اربع مرات ؟! -.. واروح اتخانق مع الدكتور واقوله انه بيضطهدنى ويقهرنى ويتريق عليا فى كل راى اقوله ...وخاطرت بمستقبلى علشان اعبر عن رايي ومعيياش من الخنقة ... يووه دا كان يوم جميل اوى الصراحة .. اينعم هو متبدلش للاحسن لحد دلوقتى .. بس انا برده مؤمنة بالمقولة اللى بتقول :

" ضاقت ولما استحكمت حلقاتها فرجت "

ويا انا يانتى ياسنة رابعة !!!!

الاعلامية المهيــــــــ ايار الكويسة ــــــــــسة