يا خبر .. دا انهاردة واحد تلاتة يا احمد .. انا مبحبش رقم تلاتة يا احمد ..حد يبدأ كتابة فى مدونته يوم واحد , شهر تلاته ياربى .. يعنى مفيش ولا رقم زوجى يلطف الجو كدا شوية , ايه الكأبة دى .. اينعم انا اختى اسمها ازار يعنى شهر مارس بس بالسريانى - ودى لغة غريبة كدا سادت بين الهيروغليفى والهيراطيقى زمااااان اوى ايام جدودنا المفرعنين قصدى الفراعين- وانا اسمى ايار يعنى شهر مايو بنفس اللغة ومايو يعنى خمسة يعنى فردى برده ..لكن اهى اسمائنا ولازم نستحملها لكن معلش ياجماعة اعزرونى .. اصلى من الناس اللى بتتفائل وتتشائم بس مش لدرجة حجاب فى رقبتى ولا فاسوخة على باب بيتنا ولا خرزة زرقا فى السلسلة لا سمح الله ..لكن انا فى العموم مبحبش الارقام الفردية بحس كدا ان كل الارقام الفردية ارقام مخلوقة بس ..علشان تعقد لنا الدنيا مثلا رقم واحد يعنى( وحدة )..يعنى تخيل لو انت واحد وبتتمشى على النيل - شكلك هايبقى وحش اوى - لكن اتنين (ونس ) خاصة لو التانى دا .. حد بتحبه .. , اما تلاتة بقى (يع خالص).. يعنى لو تلاتة اصحاب يبقى فيها حالتين: يا اما اتنين بيتكلموا ومنفضين للتالت , يا اما اتنين بيتخانقوا على واحد.. لكن تخيل بقى لو اربعة - ياسلاااام -اتنين يقعدوا مع بعض واتنين يقعدوا مع بعض - من غير خناق ولا وجع قلب - وتخيل مثلا لو معاك خمس شيكولاتات هاتوزعم على ستة من اصحابك يااااه - شكلك هايبقى اعة اخر حاجة - وعلشان كدا ياجماعه انا بعلن عصيانى على كل الارقام الفردية .. وبعلن حبى وعشقى لكل الارقام الزوجية حتى الصفر - اه والله حتى الصفر - ماهى حالة العدم دى برده بتفيد فى اوقات كتير .. وبقول ربنا يستر بس ويعدى انهاردة على خير ومشفش قطة سودا وانا نازلة الجامعة ولا حاجة .. ومعلش بقى امرى وامركم لله اننا بدانا المدونة يوم واحد تلاتة وان شاء الله اتنين تلاتة يبقى احلى واربعه تلاتة يبقى احلى واحلى .. بمشاركاتكم طبعا ..
وسمعنى سلام ياليلة العيد انستينا .... !
الاعلامية المهيــــــــــــ ايار الكويسة ـــــــــــــــسة
ليست هناك تعليقات:
إرسال تعليق